DJI-მ ახალი დრონი –Matrice 300 RTK წარადგინა. ეს არის მოდელი, რომელსაც ერთ სრულ დამუხტვაზე, 55 წუთის განმავლობაში უწყვეტად ფრენა შეუძლია, მდგრადია ნებისმიერი ამინდის მიმართ. ნებისმიერი ამინდის მიმართ მდგრადობაში კი იმას ვგულისხმობთ, რომ დრონის ამ მოდელისთვის დაბრკოლებას არ წარმოადგენს -20 გრადუსის (ცელსიუსი) პირობებში მუშაობა, ისევე, როგორც 50 გრადუს სიცხეში ფუნქციონირება. ამისათვის, მის ელემენტს სპეციალური, თვითგაგრილებისა თუ თვითგათბობის ფუნქცია აქვს. გარდა ამისა, Matrice 300-ს 3 კილოგრამამდე ტვირთის ტარება შეუძლია, რაც მის სხვადასხვაგვარი კამერებით აღჭურვას ხდის შესაძლებელს. 

Matrice 300 შეიძლება 15 კილომეტრით იყოს თქვენგან (კონტროლერისგან) დაშორებული და მიუხედავად ამისა, გიგზავნიდეთ 1080p გარჩევადობის ვიდეო გამოსახულებას. ხოლო ის გამოსახულებები, რასაც დრონი გაწვდით დაცულია AES-256 შიფრით. აღსანიშნავია, რომ დრონის მართვა ერთდროულად ორ პილოტსაც შეუძლია, იმ შემთხვევისთვის, თუ ერთ მათგანს მაინც შეექმნება მართვის პრობლემა.

აღსანიშნავია, რომ DJI Matrice 300 RTK სამომხმარებლო მიზნით ნაკლებაა შექმნილი. ის უფრო კომპანიებისთვისაა, რომლებსაც ექსტრემალურ პირობებში უწევთ ფუნქციონირება, ან უწევთ განმეორებადი მისიების შესრულება. ამ უკანასკნელის შემთხვევაში, ანუ მაშინ, როცა თქვენი მისია, დავუშვათ, დენის სადენების შემოწმება ხშირად მეორდება, ამ დრონის მოდელის გაწვრთნაც, ანუ მისიაზე მორგებაც შეიძლება. შეგვიძლია ხელოვნურ ინტელექტს, რომელიც დრონშია ინტეგრირებული, ვასწავლოთ, რომელი ობიექტის დაფიქსირებაა მისი ძირითადი მიზანი.

M300 RTK ძლიერია კამერების კუთხითაც. მასზე თავსებადია DJI’s Zenmuse H20-ის სერიის კამერები. მათ შორის, შეგვიძლია ავირჩიოთ სამკამერიანი კომბინაცია – 20 მეგაპიქსელიანი, 23x ზუმის მქონე, 12MP-იანი ფართე კუთხის კამერები, რომლებსაც თან ახლავს სპეციალური ლაზერი, რომელსაც 1200 მეტრის დაშორებით მყოფი ობიექტების პოვნა შეუძლია. სხვა მხრივ, დრონს შეგვიძლია დავუყენოთ რადიომეტრული, თერმული კამერა. ეს ფუნქცია ოპერატორების საქმეს საგრძნობლად ამარტივებს.

DJI Matrice 300 RTK-ის გამოყენება ნებისმიერ მსურველს არ შეუძლია, ამისთვის ერთგვარი ნებართვაა საჭირო. დრონი აღჭურვილია სენსორებით, რომელიც დრონს ექვსი მიმართულებით მგრძნობელობის მქონედ ხდის. მას შეუძლია 40 მეტრიდან იგრძნოს ესა თუ ის ობიექტი. როგორც სხვა უახლეს დრონებს, რომლებიც DJI-მ ბოლო დროს წარმოგვიდგინა, M300 RTK-საც აქვს კომპანიის ახალი ტექნოლოგიის AirSense მხარდაჭერა. ეს ნიშნავს, რომ მას შეუძლია ვერტმფრენი, თვითმფრინავი, ან სხვა ახლოს მყოფი მფრინავი მოწყობილობა ამოიცნოს. მით უფრო მაშინ, თუ ეს მის ფრენას საფრთხეს უქმნის.

რამდენიმე კვირის წინ, DJI-მ Mavic Air 2 წარადგინა, ამჯერად კი, მეტად სპეციფიური დრონის – Matrice 300 RTK-ის დრო დადგა. ეს ორი ახალი მოდელი გვიჩვენებს ახალ ტენდენციებს, მსოფლიოს უდიდესი დრონების მწარმოებლის – DJI-ს პროდუქტებში. Matrice 300 RTK-ის შესახებ უფრო დეტალურ ინფორმაციას შეგიძლიათ ოფიციალური ვებგვერდიდანან ქვემოთ მოცემული ვიდეოდან გაეცნოთ.

ვიდეო: https://www.youtube.com/watch?time_continue=1&v=V-4Om_4n998&feature=emb_title