როგორ ავარჩიოთ მასალა ახალი ავეჯისათვის?

 

ახალი ავეჯის შეძენა ყველასთვის სასიამოვნო და ამაღელვებელი პროცესია, თუმცა როცა საქმე მასალის არჩევას ეხება, უამრავი შეკითხვა იბადება. სწორედ ამ გაურკვევლობის თავიდან აცილების მიზნით, გთავაზობთ ავეჯის სხვადასხვა სახის მასალის მოკლე მიმოხილვას, რომელიც შეძენის პროცესში დაგეხმარებათ თქვენთვის სასურველი და, რაც მთავარია, რაციონალური გადაწყვეტილების მიღებაში.

ხე

ხე ერთ-ერთი ყველაზე გავრცელებული მასალაა ავეჯისათვის. საუკუნეების განმავლობაში ნებისმიერი დანიშნულების ავეჯი ხისგან მზადდებოდა და ინტერიერთან ყველაზე მარტივად ინტეგრირებად მასალად ითვლებოდა. გასაკვირიც არაა, რომ იგი ყველა დანარჩენი მასალისაგან მაღალი ფასითაც გამოირჩევა. თუ თქვენ ეძებთ საუკეთესო ხარისხის ავეჯს ხანგრძლივი გამოყენებისათვის, ხე ყველაზე რელევანტური არჩევანია.

ლერწამი

ისევე როგორც ხე, ლერწამიც დიდი ხნის განმავლობაში გამოიყენებოდა ავეჯის დასამზადებლად. დღეს ლერწმის ავეჯი ნაკლებად გავრცელებულია, თუმცა მისი დახვეწილი, ნატიფი და კომფორტული დიზაინი უამრავ მომხმარებელს ხიბლავს. მასალის სპეციფიკურობიდან გამომდინარე, ლერწმის ავეჯი ინტერიერის სხვა ელემენტებთან შეხამებას მოითხოვს. გარდა ამისა, იგი ნაკლებად გამძლეა და სათუთი მოფრთხილების გარეშე, დიდხანს ვერ შეძლებს თქვენი ოთახების დამშვენებას.

ფანერი

ხის ბიუჯეტური ვერსიაა. ვიზუალურად ხის იდენტურია, თუმცა მასზე ნაკლებად გამძლეა. დღესდღეობით ფანერი ერთ-ერთი ყველაზე ტრენდული და ფინანსურად ხელმისაწვდომი მასალაა.

მინა

მინის, როგორც ავეჯის მასალის გამოყენება, ინტერიერის დიზაინში თანამედროვე მიდგომად ითვლება. მართალია იგი ელეგანტურობასა და დახვეწილობას სძენს სახლს, თუმცა სხვა დანარჩენ მასალასთან შედარებით, მსხვრევადია. აქედან გამომდინარე, მინის ავეჯის შეძენა მცირე რისკთანაც ასოცირდება.

აკრილი

ვიზუალურად მინის მსგავსია, თუმცა მეტად ბიუჯეტური და გამძლე. რეკომენდებულია ხანმოკლე გამოყენებისათვის, რადგან დროთა განმავლობაში მარტივად კარგავს პირვანდელ იერსახეს.

ფოლადი

უჟანგავი რკინა და ქრომი თანამედროვე ინტერიერის შეუცვლელი ნაწილი გახდა. იგი გამოიყენება როგორც დეკორატიული, ასევე ფუნქციური ავეჯის დასამზადებლად. მიუხედავად იმისა, რომ მას სივრცეში სიმტკიცისა და სიმყარის ელემენტები შემოაქვს, კლასიკური დიზაინის მოყვარულები ფოლადისაგან დამზადებული ავეჯით ნაკლებად მოიხიბლებიან.

პლასტმასი

იგი ცნობილია როგორც ავეჯის ერთ-ერთ ყველაზე ხელმისაწვდომი, გამძლე და მოსახერხებელი სახეობა. პლასტმასისაგან დამზადებული ავეჯი გამოსადეგია, როგორც ინტერიერული, ასევე ექსტერიერული სივრცეებისათვის. პირადი სივრცეების მიღმა, იგი აქტიურად გამოიყენება კომერციულ დაწესებულებებშიც.

ტყავი

ტყავი ფართოდ გამოიყენება ავეჯისათვის სირბილისა და ელეგანტურობის მისანიჭებლად. მისი დიზაინით თანაბრად იხიბლებიან როგორც თანამედროვე, ასევე კლასიკური სტილის მოყვარულები. მომხმარებლების პირადი უპირატესობებისა და სურვილების შესაბამისად ხელმისაწვდომია ხელოვნური და ნამდვილი ტყავის ავეჯი.

ნაჭერი

უდავოდ, ნაჭერი მეტად რბილი და ნაზი მასალაა. უმეტესად ნაჭერი გამოიყენება რბილი ავეჯისათვის. ტყავისაგან განსხვავებით, ნაჭრის უამრავი სახეობა და ხარისხი არსებობს, ცხადია, მათთან ერთად იცვლება ავეჯის ღირებულებაც.

 

ახლა კი მოგახსენებთ რამდენიმე მნიშვნელოვან პუნქტს, რომელთა გათვალისწინებაც (მასალების სპეციფიკურობის ცოდნასთან ერთად) კიდევ უფრო გაგიმარტივებთ ავეჯის შერჩევის პროცესს.

 

ინტერიერის ფერი

თუ თქვენი ოთახი პატარაა, ან აქვს მუქი კედლები და იატაკი, უმჯობესია თუ მსუბუქ და მინიმალისტურ ავეჯს აარჩევთ (რეკომენდებული მასალები: ფოლადი, პლასტმასა, ფანერი).
              თუ პირიქით, დიდი სივრცე გაქვთ, ნათელი კედლებითა და იატაკით, ხის ავეჯი ულამაზესად შეავსებს ინტერიერს.

წმენდა და დეზინფექცია

თუ თქვენთვის დეტალიზებული წმენდა და დეზინფექცია პრობლემას არ წარმოადგენს, დაუფიქრებლად შეგეძლებათ ნებისმიერი მასალის ავეჯის შეძენა. თუ ალერგიულობისაკენ მიდრეკილნი ხართ, ოპტიმალური იქნება თუ არჩევანს შეაჩერებთ პლასტმასის ავეჯზე, რომელზეც მტვერი ყველაზე ნაკლები ინტენსივობით გროვდება.

თანხვედრა პირად სურვილებთან და ცხოვრების სტილთან

               და, ბოლოს, შეიძლება, თქვენი სახლი იდეალურად მოაწყოთ, თანამედროვე დიზაინის ყველა ტრენდის გათვალისწინებით, თუმცა ყოველივე ეს ნაკლებად შეესაბამებოდეს თქვენსავე ცხოვრების სტილს. ამიტომაც, ავეჯის არჩევისას მნიშვნელოვანია, გაითვალისწინოთ საკუთარი სურვილები, აღმოაჩინოთ, რა გიქმნით კომფორტის, სიმყუდროვისა და უსაფრთხოების შეგრძნებას.