რატომ უნდა იცოდნენ კარგმა ლიდერებმა “არ ვიცი-ს” ძალა?

თუკი თქვენ მაღალი დონის ბიზნეს-მენეჯერი ხართ, რაიმეს არ ცოდნა, ერთი შეხედვით, არ გეპატიებათ. ლიდერებს თითქოს ყოველთვის მოეთხოვებათ, იყვნენ მუდმივად თავდაჯერებულები და დარწმუნებულები. მოკლედ რომ ვთქვათ, ისინი უნდა იყვნენ ადამიანები, რომლებსაც პასუხი ყველაფერზე აქვთ.

თუმცა, თუკი თქვენ ლიდერი ხართ და თქვენს თავზე ამგვარად ფიქრობთ, მაშინ არასწორი გზით მიდიხართ. როდესაც თქვენთან მოდიან კითხვით, რომელზე პასუხიც არ გაქვთ, მის გამოცნობას და საკუთარი თავის დასტრესვას ნუ შეეცდებით. მარტივად უპასუხეთ “არ ვიცი” – ეს პასუხი უფრო თავმდაბალსა და თავდაჯერებულს წარმოგაჩენთ. თუკი ასე არ მოიქცევით, დიდია იმის შანსი, რომ კითხვას არასწორად გასცემთ პასუხს, რაც, რასაკვირველია, უფრო უარესია.

რატომ არ უნდა აარიდოთ თავი “არ ვიცი-ს” თქმას?

ეს ხელს უწყობს თანამშრომლობას

რაღაცის არცოდნა ლოგიკურად გულისხმობს იმას, რომ ამ რაღაცაზე პასუხი თქვენი გუნდის წევრებთან ერთად უნდა მოიძიოთ. იმ საკითხებზე ერთად მუშაობა, რომელშიც გათვითცნობიერებული არ ხართ, გუნდში კოლაბორაციას უწყობს ხელს და მათთან უფრო მეტად კარგი დამოკიდებულება/ურთიერთობა გიყალიბდებათ. გარდა ამისა, თუ თქვენ აღიარებთ იმას, რომ რაღაც არ იცით, თქვენი თანამშრომლები თავს თქვენთან თანასწორად იგრძნობენ და უფრო ახლობლური კუთხით შემოგხედავენ. ჯგუფური ძალისხმევით მიღწეული წარმატება ბევრად უფრო ძლიერია, ვიდრე – ერთი ადამიანის მეშვეობით. მსგავსი შემთვევები კორპორატიული კულტურის გაღვივებას უწყობს ხელს.

ეს აძლიერებს თქვენს თანამშრომლებს

როდესაც თქვენს გუნდში ყოველთვის მოიძებნება ისეთი ვინმე, ვინც პასუხი იცის, რატომ უნდა შეაწუხოთ საკუთარი თავი პასუხის გამოცნობით? თქვენი გუნდის წევრები ვერასოდეს იქნებიან დამოუკიდებელი, პროაქტიული თანამშრომლები, თუ ფიქრობენ, რომ მათი ცოდნა და უნარები არ ფასდება. მხოლოდ და მხოლოდ ხელს შეუშლის მათ ლიდერის უნარის განვითარებას. ბოლოს და ბოლოს, ეს ხომ ის ადამიანები არიან, რომლებიც იმიტომ აიყვანეთ, რომ მათი იმედი გქონოდათ და კარგ კადრად თვლიდით? ამიტომაც უნდა გამოიყენოთ მათი პოტენციალი და აგრძნობინოთ, რომ ისინი დასაფასებლები არიან.

ეს ურთიერთობას უფრო სასიამოვნოს გახდის

თანამშრომლებს სურთ იმუშაონ იმ ლიდერებისთვის, ვინც მათ შთააგონებს და არა იმგვარი ადამიანებისთვის, ვინც მათ მხოლოდ იმას ეუბნება, თუ რა უნდა აკეთონ. თანამშრომლებსა და ლიდერს შორის გამჭვირვალეობა აუცილებელია ნებისმიერი კომპანიის და მენეჯმენტის გუნდისთვის იმისთვის, რომ შექმნან ძლიერი კულტურა ამ გუნდის წევრებს შორის.

დღესდღეობით ნებისმიერ სფეროში ყოველდღიურად იმკვიდრებს ადგილს ახალ-ახალი ჟარგონები, რომელთა ათვისება არც თუ ისე მარტივია. შესაბამისად, ეს ჟარგონები შეიძლება, ლიდერმაც კი არ იცოდეს. ასე რომ, ყოველთვის, როდესაც რეპორტებს წარადგენთ, იხელთეთ დრო და სთხოვეთ თქვენს გუნდს, აგიხსნათ ყველა ტერმინი, რომლებიც არ გესმით. შედეგად, კი თქვენ გექნებათ იმედი იმის, რომ ისინი მათ ყოველთვის აგიხსნიან და გაუგებრობა არ იარსებებს.

მას შემდეგ, რაც თქვენ ამგვარად მოიქცევით, თქვენს თანამშრომლებს არ შეეშინდებათ, მსგავსადვე მოიქცნენ. ძლიერი გუნდური მუშაობა და კორპორატიული კულტურის ჩამოყალიბება საუბრით იწყება. ასე რომ, ეცადეთ, თქვენს თანამშრომლებთან მეტად გულახდილი იყოთ.

წყარო: marketer.ge